Балалардың есту мүшесін протездеу ерекшеліктері

Ерте диагностика, сондай-ақ заманауи есту аппараттарының жоғары сапасы есту мүшесін ерте жаста протездеу үшін барлық жағдайды жасайды. Өмірдің алғашқы айларында есту қабілеті бұзылған балалар үшін есту мүшесін протездеуінің оңтайлы жасы – 4-6 ай. Олардың есту аппараттарына үйренуі әр баланың жеке ерекшеліктеріне байланысты бір аптадан бірнеше айға дейін созылады. Бір жастан асқан балалардың есту аппараттарына үйренуі жиі жағдайда бірнеше айға созылады.
Ата-аналар сурдопедагогтермен бірге баланы есту аппараттарының көмегімен естуге үйретуі керек. Кейін бала дыбыстарға қызығушылық танытып, оларды түсінуге үйренгенде, олар есту аппараттарын қуана киеді.
Ерте жастағы балалардың есту мүшесін протездеу үшін жоғары сапалы дыбысталу мен дәлме-дәл теңшеуге мүмкіндік беретін, сондай-ақ қатты дыбыстардың шамадан тыс күшеюінен қорғайтын сандық есту аппараттарын қолданған жөн.

Балаларға есту аппараттарын таңдағанда, қуат қорын 30-35%-ға қамтамасыз ететін модельді таңдау керек, себебі кейбір балаларда өмірінің алғашқы жылдарында есту қабілетінің біртіндеп төмендеуі байқалады, ал бұл "қуат резерві" оны өтей алады.
Баланың есту қабілетін үнемі бақылау және есту мүшесін протездеудің тиімділігін бағалау қажет. Баланың есту қабілеті нашарлаған кезде оның есту аппаратын неғұрлым қуатты модельге ауыстыру қажет болуы мүмкін. Кішкентай балаларда есту аппаратын тиімді теңшеу есту мүшесін протездеу маманының сурдопедагогпен және баланы оңалтумен айналысатын ата-аналармен өзара әрекеттескенде ғана мүмкін болады.
Мамандар мен ата-аналар баланың сөйлеу тілдік дыбыстарға және қоршаған орта дыбыстарына деген реакциясының дамуын, баланың сөйлеу тілінің дамуын бақылайды, сондай-ақ дыбыстарға қатысты мүмкін болатын теріс реакциялардың пайда болуын атап көрсетеді. Ата-аналарға баланың есту реакциясын бақылау күнделігін жүргізу ұсынылады.
Толық ақпаратты ӘБЕО орталығының есту мүшесін протездеу маманынан алуға болады.